आज ठरणार वर्ल्डकप संघ

0

मुंबई :  आयपीएलमध्ये खेळताना ‘फिटनेस जपा…’, ‘क्रिकेटचे पुस्तकी फटकेच खेळा… नको त्या सवयी लावून घेऊ नका!’ ‘आम्ही गेले वर्षभर वर्ल्डकप संघनिवडीच्या दृष्टिने खेळाडूंना आजमावत आहोत…’ असे टीम इंडियाचा कर्णधार विराट कोहली आणि प्रशिक्षक रवी शास्त्री गेले काही महिने सातत्याने सांगत आहेत. आज, सोमवारी या सगळ्या पूर्वतयारीच्या धोरणांच्या निकालाचा पहिला टप्पा आहे. इंग्लंडमध्ये ३० मेपासून रंगणाऱ्या आगामी वनडे वर्ल्डकपसाठी भारतीय संघाची निवड आज, मुंबईत होते आहे. अन् या सगळ्या खबरदारीतून काय निष्पन्न होते त्याचा निकाल इंग्लंडमधील वर्ल्डकपमध्ये तमाम भारतीय पाठिराख्यांना दिसेलच.

सोमवारी वानखेडेवर मुंबई इंडियन्स विरुद्ध रॉयल चॅलेंजर्स बेंगळुरू ही लढत होते आहे. बेंगळुरूचे नेतृत्व करणारा भारताचा कर्णधार विराट कोहलीदेखील त्यानिमित्ताने मुंबईत असेल. बीसीसीआयच्या पत्रकात नमूद करण्यात आले आहे की, त्यानुसार दुपारी तीनच्या सुमारास वर्ल्डकपच्या संघाची घोषणा होईल. गेले वर्षभर आमचे संघबांधणीसाठी प्रयत्न सुरू असून आता टीम इंडियातील फक्त एकच जागा भरायची राहिली आहे, असे भारताचा कर्णधार विराटने घरच्या मैदानावरील ऑस्ट्रेलियाविरुद्धची मालिका आटोपली तेव्हा सांगितले होते. तसे असले तरी एका मुद्यावर हमखास चर्चा होईल अन् ती म्हणजे, अतिरिक्त यष्टीरक्षक म्हणून ऋषभ पंत इंग्लंड जाईल की दिनेश कार्तिक.
पंत की कार्तिक?
ऋषभ पंतने यंदाच्या आयपीएलमध्ये आतापर्यंत २२२ धावा केल्या असून दिनेश कार्तिकच्या नावावर ९३ धावाच आहेत. त्यामुळे सध्या तरी पंतचे पारडे जड आहे. स्पिनरच्या माऱ्यावर पंतच्या यष्टीरक्षणातील चुका उघड्या पडतात हे नजरेआड करुन चालणार नाही. फलंदाजी फॉर्मात असलेल्या पंत उजवा वाटत जरी असला, तरी कार्तिक हे यष्टीरक्षणातील मुरलेले नाव आहे. याच दरम्यान आयपीएलमध्ये आतापर्यंतच्या लढतींमध्ये ३३५ धावा ठोकून लोकेश राहुलने आपले नाणे खणखणीत वाजवून दाखवले आहे. त्याचा तिसरा सलामीवीर म्हणून विचार होऊ शकेल. त्यात किंग्ज इलेव्हन पंजाब संघ राहुलकडून सातत्याने यष्टीरक्षणही करवून घेत आहे.

. . तर रायुडूला संधी
राहुलचा जर राखीव यष्टीरक्षक म्हणून विचार झाला, तर अम्बटी रायुडूला चौथ्या क्रमांकाचा तज्ज्ञ फलंदाज म्हणून दार खुले होईल. अगदी गेल्यार्षीच्या नोव्हेंबरपर्यंत विराट कोहली आणि रवी शास्त्री य़ांना रायुडूच्या चौथ्या क्रमांकाबाबत खात्री होती. मात्र तेज गोलंदाजांविरुद्ध रायुडू कच्चा असल्याचे पुढे आल्याने रायुडूच्या समावेशाबाबत प्रश्नचिन्ह निर्माण झाले आहे. मुंबईचा फलंदाज आणि आयपीएलच्या दिल्ली कॅपिटल्सचा संघनायक श्रेयस अय्यरबाबत आशा होती. त्याने यंदाच्या आयपीएल मोसमात २२१ धावा केल्याही आहेत, पण खणखणीत कामगिरीचा अभावामुळे किंवा ‘मॅचविनिंग’ खेळी न झाल्याने श्रेयसचे नाव मागे पडल्यासारखे झाले आहे. त्याबदल्यात संघव्यवस्थापन अष्टपैलू विजय शंकरचा चौथ्या क्रमांकासाठी विचार करू शकते. तसे झाले, तर रायुडूच्या आशांवर पाणी फेरले जाईल.

चौथा तज्ज्ञ तेज गोलंदाज
इंग्लंडमधील वातावरण, खेळपट्ट्यांवर तेज गोलंदाजांना फायदा होतो. खासकरून बर्मिंगहॅम, लीड्स आणि मँचेस्टर येथे तेज गोलंदाजांना पोषक वातावरण आहे. बीसीसीआयशी संबंधित सुत्रांनी सांगितल्याप्रमाणे ‘चौथा तेज गोलंदाज म्हणून संघव्यवस्थापनाने विजय शंकर आणि हार्दिक पंड्या हे पर्याय समोर ठवले आहेत. याशिवाय रवींद्र जाडेजाचे अष्टपैलूत्वही संघासाठी फायद्याचे ठरू शकते’. उमेश यादवच्या माऱ्यात सातत्य नाही. खलील अहमद अजूनही मोठ्या स्तरासाठी परीपक्व झालेला नाही. मागील कामगिरीच्या जोरावर इशांत शर्माचा विचार होऊ शकेल. मात्र असे अनपेक्षित नाव संघात येईल असे वाटत नाही. ‘निवड समितीदेखील खूप काटेकोर आहे. १९९९च्या वर्ल्डकपमध्ये अमेय खुरासिया हे अनपेक्षित नाव संघात आले होते, तर २००३च्या वर्ल्डकपमध्ये दिनेश मोंगियाला ‘लॉटरी’ लागली होती, अशा गोष्टी यंदाच्या संघनिवडीत होतील असे वाटत नाही’, असेही सुत्रांनी स्पष्ट केले.

असा असू शकेल संघ
-) स्थान निश्चित समजले जाणारे १४ खेळाडू: विराट कोहली (कर्णधार), रोहित शर्मा (उपकर्णधार), शिखर धवन, लोकेश राहुल, महेंद्रसिंग धोनी (यष्टीरक्षक), केदार जाधव, हार्दिक पंड्या, विजय शंकर, कुलदीप यादव, युझवेंद्र चहल, जसप्रीत बुमराह, भुवनेश्वरकुमार, मोहम्मद शमी, रवींद्र जाडेजा.
-)१५व्या खेळाडूसाठी पर्याय
दुसरा यष्टीरक्षकः दिनेश कार्तिक/ऋषभ पंत
-)चौथ्या क्रमांकासाठी तज्ज्ञ फलंदाज हवा असल्यासः अम्बटी रायुडू.
-)चौथा तेज गोलंदाजः उमेश यादव/खलील अहमद/इशांत शर्मा/नवदीप सैनी.
दृष्टिक्षेप
१)भारताचा कर्णधार विराटच्या म्हणण्यानुसार एका जागेचा अपवाद वगळता संघ जवळपास निश्चित आहे. मग त्या जागी अतिरिक्त यष्टीरक्षकाची निवड होईल की अतिरिक्त तेज गोलंदाज किंवा चौथ्या क्रमांकाचा तज्ज्ञ फलंदाज भारतीय संघात येईल.

२)कार्तिक हा मुरलेला यष्टीरक्षक असून स्पिनरच्या माऱ्यावर यष्टीरक्षण करताना पंतची पंचाईत होत असल्याचे उघड झाले आहे.

३)रायुडू हा चौथ्या क्रमांकाचा तज्ज्ञ फलंदाज ठरू शकतो; पण तेज गोलंदाजांविरुद्ध रायुडू कच्चा असल्याचे दृष्टिआड करुन चालणार नाही.

LEAVE A REPLY

Please enter your comment!
Please enter your name here