गणेशोत्सवापूर्वी महाराष्ट्र चुलमुक्त : अर्थमंत्री मुनगंटीवार

0

मुंबई (प्रतिनिधी) :

महाराष्ट्र राज्यात ४५ लाख कुटुंबांकडे गॅस जोडणी नाही. त्यांना गणेशोत्सवापूर्वी गॅस जोडणी देऊन अवघा महाराष्ट्र चूलमुक्त करणार आहे, अशी माहिती अर्थ व नियोजन मंत्री सुधीर मुनगंटीवार यांनी येथे दिली. सह्याद्री अतिथीगृहात झालेल्या बैठकीत ते बोलत होते.

चुलीच्या धुरापासून महिलांच्या डोळ्यांना होणारा त्रास थांबविण्यासाठी प्रधानमंत्री उज्ज्वला योजना देशभर राबविली जात आहे. या योजनेअंतर्गत महाराष्ट्रात ज्या लाभार्थींना गॅस जोडणी देणे शक्य आहे, त्यांची यादी तयार करण्यात यावी. याबाबत राज्याच्या मुख्य सचिवांनी सर्व संबंधितांची बैठक घ्यावी, अशा सूचना मुनगंटीवार यांनी दिल्या आहेत. जे लाभार्थी उज्ज्वला योजनेचा लाभ घेऊ शकत नाहीत, त्यांना गॅस जोडणी देण्यासाठी राज्य सरकार निधी उपलब्ध करून देईल. अन्न व नागरी पुरवठा विभागाने याचा सविस्तर अभ्यास करून लागणाऱ्या निधीचा प्रस्ताव वित्त विभागाकडे सादर करावा, त्यास मंजुरी दिली जाईल, असे मुनगंटीवार यांनी स्पष्ट केले. या बैठकीस अन्न व नागरी पुरवठा मंत्री गिरीश बापट, विभागाचे प्रधान सचिव महेश पाठक, चंद्रपूरचे जिल्हाधिकारी कुणाल खेमणार यांच्यासह सर्व संबंधित अधिकारी उपस्थित होते.

LEAVE A REPLY

Please enter your comment!
Please enter your name here