आघाडीच्याही प्रचाराचा शुभारंभ कोल्हापूरातून

0

कोल्हापूर (प्रतिनिधी) :

भारतीय जनता पक्ष-शिवसेनेपाठोपाठ काँग्रेस राष्ट्रवादी काँग्रेस आघाडीच्या प्रचाराचा शुभारंभही कोल्हापुरातून होणार आहे. युतीची सभा रविवार (दि. २४ मार्च) रोजी येथील गांधी मैदानात होत असून त्यानंतर दोन ते तीन दिवसात आघाडीची जंगी सभा घेण्याचे नियोजन सुरू असल्याचे राष्ट्रवादीचे आमदार हसन मुश्रीफ व खासदार धनंजय महाडिक यांनी सांगितले. युतीपेक्षा मोठी सभा घेण्याचे नियोजन असल्याचेही दोघांनी पत्रकारांशी बोलताना स्पष्ट केले.

लोकसभा निवडणुकीसाठी काँग्रेस, राष्ट्रवादी काँग्रेस आणि मित्रपक्षांची आघाडी झाली आहे. कोल्हापूर लोकसभा मतदारसंघ हा राष्ट्रवादीच्या वाट्याला आला आहे. येथून विद्यमान खासदार धनंजय महाडिक यांची उमेदवारी निश्चित असून त्यांनी प्रचाराला सुरूवात केली आहे. गुरुवारी खासदार महाडिक व आमदार मुश्रीफ यांच्या उपस्थितीत कोल्हापूर शहरातील आजी, माजी नगरसेवक व प्रमुख पदाधिकाऱ्यांची बैठक झाली. या बैठकीनंतर पत्रकारांशी बोलताना त्यांनी कोल्हापुरातून आघाडीच्या प्रचाराचा शुभारंभ करणार असल्याचे सांगितले.

आमदार मुश्रीफ म्हणाले, ‘राष्ट्रवादीचे नेते शरद पवार व काँग्रेसच्या नेत्या प्रियांका गांधी यांच्या प्रमुख उपस्थितीत काँग्रेस, राष्ट्रवादी काँग्रेस आघाडीच्या प्रचाराची सुरुवात व्हावी यासाठी खासदार महाडिक प्रयत्नशील आहेत. ते गांधी यांच्याशी संपर्क साधत आहेत. कोल्हापुरातील आघाडीची सभा ही युतीच्या सभेपेक्षा मोठी होईल, या पद्धतीने नियोजन केले जाईल.’

खासदार महाडिक म्हणाले, ‘समाजातील सर्वच घटक भाजप सरकारच्या विरोधात आहेत. सध्यस्थितीत काँग्रेस, राष्ट्रवादीला पोषक वातावरण आहे. कोल्हापुरात संयुक्त सभा घेऊन प्रचाराचा धडाक्यात प्रारंभ होईल. प्रियांका गांधी यांना सभेसाठी आणण्याचा प्रयत्न सुरू आहे. पवार व गांधी यांच्या संयुक्त सभेद्वारे प्रचाराचा धडाका निर्माण होईल.’

LEAVE A REPLY

Please enter your comment!
Please enter your name here